香港家書

今日一早, 聽住香港電台, 好喜歡其中一個叫做<香港家書>o既節目...係在每一集中, 搵d o個個時期比較update 既相關人物, 讀出佢o地希望讓香港人知道o既想法, 以家書型式表達.

今日o既嘉賓, 係上年8月康泰菲律賓事件中死難者領隊 MASA 謝霆駿o既媽媽...

聽見呢位老人家, 講述佢痛失仔仔後o既日子...謝媽媽說, ''以前你鍾意狗, 話養狗可以o係你出o左去旅行唔係屋企o既日子, 等狗仔可以陪下我...點知,真係講中o左...而家佢成日都静静o甘同我一齊陪住我...''

''阿仔, 你唔駛擔心我, 我無事, 哥哥,細佬同爸爸會照顧我...你好似以前o甘, 好開心o甘四周圍去, 係第二個世界開心o甘生活, 好似最後一日o甘, 继续照顧死去o既團友啦...''

然後, 謝媽媽好激動o甘話, 好憤怒立法會否決撥款去支持向菲律賓方面控訴,尋找真相...謝媽媽好悲憤o甘話, ''MASA, 我o係死因庭聽到易小玲講, 你俾人掉o左出去, 無人理你, 一個人係巴士門度俾雨淋...我唔會俾你白白o甘死得不明不白, 我同埋d生還團友, 唔會放棄, 直到搵到真相同埋公道為止.''

唉, 聽到一個老人家, 理應係要享兒孫福o既時候, 卻要承受呢d生命中不能承受o既痛, 真係好心酸, 猶其係知道自己既家人死得o甘無辜, o甘委屈...我諗, 謝媽媽甚至其他生還團友同佢o既家人, 真係可能一世都唔會真正o甘開心...永遠有呢個傷口...

但願, 佢地會看開點...會有一個平安o既心靈...平安o既生活~