朗誦節

Tyler 第一次參加實體嘅校際朗誦節 (上一年係 video), 今朝一早去文化中心報到，第一場有26個男仔，其實篇詩詞好短，一分鐘內都可以完成。

阿仔不嬲都唔係鍾意表達、表演嘅人，present 同朗誦完全係佢「憎」嘅 tasks… 所以我同佢報，佢都唔係咁想去，但我話，今年已經俾咗錢，一定要去…

佢係18號，即係要聽17個一模一樣嘅詩詞先到佢，我覺得呢個先係大挑戰 🤣 第一位小朋友出場，睇佢一d都唔緊張，但就以廣東話嚟朗誦一首suppose 係普通話嘅 poem 😅 有啲小朋友就超細聲到真係聽唔到… 至於 Tyler, 當然唔可以用出色嚟形容㗎啦，但，以媽媽我認識嘅佢，已經 out of 我嘅 expectation… 做得非常好👍🏻 佢至少將我哋一個月內教佢叫佢做嘅 actions 全部做齊：大聲、速度慢、有啲抑揚顿挫（當然佢係做唔到人地好浮誇個種，佢之前拒絕學 YouTube， 話唔鍾意咁誇張😅）、望觀眾而唔好望地下等。

佢個組有2場，大概50個小朋友比賽，佢攞83分，比上一年進步咗… 有時候，做自己唔擅長嘅事情，出盡力，亦都做到 self best, 同其他人比較，可能都好中庸，呢個係我今日嘅體會 😆

Overall, 呢個校際朗誦節，對阿仔都係好好嘅 experience, 佢話佢學到點樣係緊張中控制自己心情，亦都唔好比其他小朋友嘅動作影響（佢話怕跟左其他人d動作😆）。對我呢個內向仔仔嚟講，今日嘅朗誦體驗，一d都唔容易，我好 proud 佢今日一一做到練習嘅元素，雖然係評判眼中唔係出色，但係爸爸媽媽眼中，你已經做得非常好，叻仔👍🏻

Side note:

香港小朋友真係參加好多比賽，就呢個朗誦節，身邊已經識好多人參加。有啲趣事想紀錄下：

1. 話說阿仔同班同學參賽，當小朋友朗誦完，老師同佢講：你表現得好好，可惜你背誦嘅唔係我地呢個組別嘅詩詞，所以唔好意思，我哋要 disqualify 你 。 應該係媽媽擺咗個大烏龍… 童年陰影莫過如此 😨

2. 另一個朋友仔，不嬲都好有主見，佢阿媽同佢報名時，以為好似上一年咁，係 video， 點知covid 後，回復返實體，結果比賽前幾日，佢同媽媽講唔會去，因為佢無問過佢，佢亦無應承過… 咁係唔尊重佢… 結果，真係無去 😅

巧合

尋日去咗St. Paul 做個小手術，三年前都做過，所以大概都知個流程。入到院，俾咗 deposit 再上房，今次居然係產科個層，可能而家真係少咗人生BB，有吉房 available…

我張床位，居然同2020年生妹妹時一樣，同一間房，仲要同一張床 （501B) 😂 我同老公都覺得好神奇！望住窗外個個熟悉嘅景，好多回憶返返嚟～

更搞笑嘅係，我對面床個女士，竟然同我個名好相似（英文拼音幾乎一樣），姑娘都話好有緣分！

嘆世界

d人成日話呢一代小朋友享受至上，唔捱得… 但又老實講，我哋阿爸阿媽都成日批評我哋唔捱得…

尋日，跟我個高層閨密（😆）去 member-only 個 d high class clubhouse, 先係去食個正正法餐… 前菜係牛舌、主菜 beef wellington, 甜品就係白松露 pudding, 食到好飽… 之後，再去 wet facilities, 我原本以為係去游水，點知，原來除咗游水之外，仲可以浸溫泉（當然唔係天然泉水），但個 hotpool,加個無敵維港海景，真係luxury 嘅享受😎 hotpool 隔離就係冰池，如果唔怕凍，可以過一過冷河，我friend 話，成日黎，感覺皮膚都滑咗不少～ 其他設施有 sauna 同 private resting area and benches, 得閑嚟 hea 下，人生都美好啲😆

我哋5點左右去咗游水，游一陣又上水出去個 balcony 躺係沙灘椅度休息，對於個西九日落美景，太relaxed 了。突然收到阿仔個 FaceTime call, 即刻㩒 accept, 佢見到我著住浴袍同訓o係沙灘椅，好 surprised： 媽媽，你係邊度啊？點解唔駛返工嘅？

我答：姨姨带我去玩… 今日下午放假！

佢即刻話：你咁懶架，唔返工，去咗嘆 SPA！

我o地即刻 shock 咗，點解佢會識 SPA, 仲要用嘆字嚟形容，嘆 SPA ~ 😆

我估，佢應該係跟得佢阿媽多，睇太多 Christy 姐姐嘅潮什麼！

做個誠實的好孩子

尋日妹妹放學返屋企，換衫前突然o係運動褲袋攞咗幾舊玩具小積木同一隻介子仔出o黎，好開心叫我o地睇。見到o個堆嘢，媽媽我心感不妙，有些少懷疑…

之後，我同婆婆輪流問佢：「𠵱，呢啲玩具邊度攞㗎？邊個俾你㗎？」妹妹依然好開心講：「學校啊… 個介子係遊戲場。」🫣

婆婆即刻好大反應：「吓，學校嘅玩具唔可以攞返屋企㗎喎！有冇問老師？」妹妹個樣嚇咗一嚇，可能 feel 到自己做左 d 唔好嘅事，所以即刻講：「老師話可以㗎！」

嗰一刻，媽媽我心情係 OMG 😨 點解呢個小女孩講大話可以咁自然⋯⋯ 

我再溫柔咁試探下，妹妹，呢啲玩具點玩架？放喺邊度架？係咪老師俾㗎？

呢隻妺妹太醒，可能已經知道自己「瀨嘢」，所以盡量差開話題，無正面回答。當然，我亦都唔想我哋誤會左佢，所以當日下午，我打俾老師確認返件事，結果係老師無俾玩具小朋友拎返屋企玩。我o係電話度同老師講，我聽日會叫妹妹還返啲玩具，同埋今晚我會同佢講返正確嘅行為，亦都請老師聽日可以同妹妹講多一次 class rule。

今朝，我決定陪佢一齊返學，親自還返啲玩具俾老師，妹妹入到課室，我陪住佢同老師講，我哋還返啲玩具返嚟啦，亦都知道以後唔可以帶學校啲野返屋企啦！老師都好好，同佢講：「唔緊要，係唔係尋日唔小心拎咗，還返o黎就可以啦。」個一刻，我諗妹妹都唔好意思，不斷擦眼睛… 

呢次係一次好好嘅學習機會，希望佢會明白，以後要做一個誠實嘅小朋友🙏🏻

唔會蝕抵的妹妹

之前o既 post 都提過妹妹豬絕對係一個有啲古惑，非常 street smart 嘅人，而家，了解深o左之後，再要加多樣 ”strength”, 就係唔會蝕抵～

話說今日爸爸同妹妹整咗個 Bohemia Look, 帶o左個頭 coo 仔，佢好鍾意… 哥哥同佢玩，但手衰衰咁將佢個頭 coo 拉咗落嚟，妹妹即刻超大反應，喊得好激動… 我o個一刻都唔知點解，好燥底，突然火起，狂鬧哥哥… 結果，哥哥好傷心咁喊咗好耐 🥺

我見到佢喊，已經立即好後悔，感覺自己反應過大，唔知會唔會誤會o左佢… 我等佢冷靜啲，就入房想安慰o下佢，但阿仔可能仲未平伏，急急腳咁走出廳，係飯枱角落背住我哋默默咁流眼淚 😣

我走過去，攬住佢，細細聲問佢：「係咪媽媽誤會o左你？」佢搖頭，老公話佢係想同妹妹玩，但無諗過佢反應咁大…

我再同阿仔講：「雖然媽媽無誤會，但頭先咁大聲鬧你，係媽媽做得唔好，我要同你道歉…」

佢聽到之後又激動喊咗一陣，但攬住我時，感覺到佢無再委屈…

突然間，聽到妹妹把聲，原來佢叫緊我… 

妹妹：「媽媽，你頭先都有鬧我！」然後加個委屈嘅喊樣😓

Well… 咁為咗公平起見，我都輕輕同妹妹道歉… 等佢心理平衡啲 😜

但，呢個小姐，年紀細細，都真係唔會蝕抵！

校長的話

今晚去咗妹妹幼稚園嘅家長講座，雖然同哥哥當年講嘅內容差唔多，但今次應該係最後一次嘅K1 cycle, 都想「重溫」一下呢個感覺 😆

其中一個校長講嘅comment 好好笑，佢話唔知係咪 Covid 呢幾年小朋友少咗機會講嘢，又要帶口罩，所以講嘢唔清同有懶音… 佢講笑話：各位家長，我個名叫阮校長呀，唔係魚校雀，我唔係魚，亦都唔係雀嚟，麻煩大家同小朋友講下🤣

此外，佢結尾亦都提醒家長，育兒路好漫長，要記住三手：放手、忍手和拍手！

呢3點，真係值得深思 👍🏻

英文聲

今日打風，所以雖然係9月1日，小朋友都唔駛返學，我哋啱啱去完日本旅行，呢個風假真係啱啱好～

老公因為快要join seminar, 所以仲要返工，work from home… 佢今朝開會時，妹妹啱啱行過，佢問我：媽媽，爸爸仲咩有英文聲？

我 confused 咗一陣，終於意會到佢嘅意思… 原來佢問，爸爸仲咩講英文？

Well, 阿囡，其實爸爸係用國語開緊會 😆

我要美斯

我得承認，我係美斯嘅 fans, 所以2022世界杯，我都買咗2件美斯波衫俾 阿仔同妹妹著住，支持一下偶像，結果，阿根廷贏咗冠軍 🏆🇦🇷

可能妹妹成日聽我講美斯啲新聞同睇比賽，佢都好熟識呢個名字，今日晚飯，佢突然跑去婆婆到大叫：我要美斯，我要美斯！

我哋完全唔明佢咩意思，所以大家都望住佢，然後，佢指住枱上碟節瓜蒸粉絲，大叫：添美斯呀！

結果，又係笑到我地肚痛！

狀員爭霸戰

感恩 so far 阿仔係學校讀得唔錯，老師都俾機會佢試唔同嘅嘢… 今個禮拜佢就做咗班代表，同其他3個同學仔參加學校嘅「狀員爭霸戰」😂

大家都應該無咩點準備，老師淨係叫佢地 weekend 溫吓中英數常同中華文化… 我哋都無咩 idea 點溫，常識同中華文化就開 YouTube 睇吓，中英數就無得點溫，之前有幾多料就係幾多料吧！

結果，佢哋比賽成績當然一般般，排第三，1C/1D 雙冠軍。阿仔又無咩，仲同我地講：「媽媽，千祈唔好攞冠軍呀，要做古代人，好熱㗎⋯⋯ 」（我諗，佢意思係，贏咗，學校要小朋友著古裝，影相留念）

然後，佢再 emphasise 一個重點：同埋，冠亞季軍同最尾 d 禮物都一樣嘅～

OH OK, ，阿仔，原來係咁 😅

Birthday Potty

上個禮拜去咗一個小朋友嘅生日會，妹妹玩得好開心～

尋日，我哋玩緊嘅時候順便商量下哥哥生日做咩好，妹妹突然大聲講：potty, potty 呀⋯⋯

哥哥可能好 confused, 問佢：你要 potty 做咩？all shu shu?

妹妺：唔係，potty 呀，birthday potty~

然後，我哋終於都意會到！

問妹妹：你係唔係想講 birthday party 呀？ 

之後，小姐就好開心咁點頭，然後跑走咗，繼續玩～

Baby Dolls

自從 YouTube 介紹咗俾妹妹 baby doll 嘅 video 之後，佢就鐘意咗呢個玩意。

佢3歲生日，就送咗個BB俾佢，係佢第三個 baby… 尋晚，同佢玩 baby role play 時，佢好用心咁介紹佢啲寶貝俾我識… 

「呢個係郭麗麗、呢個叫郭美美，係婆婆改嘅名…」

然後，我指住最新個 baby, 咁佢叫咩名呀？

妹妹呆左一陣，好明顯係唔記得咗…

然後，3秒之後，就好有信心同我講：佢叫阿姐！

呢個回應，真係噴飯 😆

今日問返婆婆，原來新 baby 叫靚靚 ～

你做咩呀

又一個關於妹妹嘅英文笑話一則：

我地教佢問人做咩嘅時候，要講 “What are you doing?”

最初，佢都未掌握到，經過幾次之後，會講 “What you doing?” 我以為，咦，進步咗喎，就快成功講到啦～

然後，有一日，竟然「進化」到”What doing?”

尋日，無啦啦佢同我講：”What do?”

阿囡，可唔可以再懶啲呀？🤯

考試獎勵

阿仔今年成為咗小學雞，雖然係比較 happy school, 但始終都係傳統學校，考試默書功課在所難免，興幸，佢都唔抗拒坐定定溫習，成績 so far 都唔錯。

平時，我哋都set 個比較高嘅目標比佢，因為佢學校程度唔深，以下就係佢嘅 Tier of Awards 😂

1. 中文寫作、中文閱讀、英文同數學如果全部滿分： 微影車一架

2. 如果平均每份卷錯少過2題: Tomica 車一架

3. 如果每份卷錯少過3題：每一份過關卷可以玩3次冒險樂園或Namco

今日，阿仔同我講某位同學仔好慘，因為佢考試70分會有奬品… 我心諗，咁正？然後，佢就解釋：

佢媽咪話如果考70-80，就會奬2本練習；考80-90，就奬一本練習，如果90分以上，先有真正嘅奬品😆

我聽完之後，真係佩服o個位媽咪，太有計啦！

生多個的煩惱

尋日同 Tyler 訓覺嘅時候，唔知講開d咩有關生bb嘅話題，我同佢講，媽媽生 bb 好辛苦、好痛㗎，佢就問：咁，係咪只係可以生2個bb？

我答：咁又唔係，唔怕辛苦，都可以生3、4、5、6、7個嘅… 你想唔想多幾個兄弟姊妹呀？

估唔到，佢諗都唔諗，即刻答：唔想！

我：吓，點解呀？生對twins 好可愛喎！

Tyler: 唔好呀，妹妹已經好煩，如果多啲bb，妹妹一定帶埋啲 bb 過嚟，搶我啲寶石呀（佢d 寶貝 plastic jewels 😂)… 

有時小朋友嘅思想，真係估佢唔到～

之後，我再問：咁，如果塞返妹妹返去呢？咁就無人煩住你啦？

Tyler: 咁又唔好。keep 返妹妹啦。

始終，佢都好錫佢個妹 💕

Hello Kitty

今個禮拜終於下定決心俾阿仔學大提琴，係網上買咗個二手，希望佢試吓先。

買咗返屋企，阿仔當然好興奮，咁大份禮物喎！與此同時，個女當然唔會放過我地，問： 恩恩呢？

嘩，好彩我轉數快，記起之前買咗個 ukelele, 即刻攞出黎俾佢，話呢個係BB大提琴，佢即刻非常happy 😂 

媽媽我真係天才！

過咗2日，當我睇緊電視，阿女突然問我佢個琴係邊？我叫佢搵工人姐姐… 佢啲英文仲係好baby，我就教佢問姐姐：Where is my ukelele?

見佢滿懷自信咁跑入廚房，大大聲問姐姐：Where my hello kitty? 

個一刻，真係噴飯！呢個妹妹，真係搞笑高手~

善長人翁

今日阿仔有啲心事咁，原來佢o個班要換班長啦⋯ 班主任下學期啱啱轉全日制後，就揀咗佢做班長，家長日時話因為佢做嘢有交帶，爽手，同埋搞得掂自己嘢😂

不經不覺就做咗差唔多三個月，佢都好鍾意做班長，因為可以摘名同入教員室，好勁喎！

所以，今日要親手將個班長牌交俾下一個小朋友時，佢應該好唔捨得，但都係一次好好嘅經歷～

然後，我問佢，做完班長之後，你有咩班務呀？佢就答：我做善長呀。

我心諗，吓，善咩長呀，東華籌款呀？

我問：咩黎㗎？

佢話，膳長呀，食午餐時，派完飯負責寫低小朋友食咩餐呀⋯咁都唔識！

Oh… sorry 呀，阿媽我真係第一次聽到呢啲職務😂

反轉

妹妹豬不嬲都係唔按本子辦事嘅人，我諗，佢大個咗都唔會好 follow rules … 其實呢方面，係有啲似後生嘅我 😂

話說今日喺廳，妹妹話要痾尿尿，但當我過到去佢身邊，諗住換片時，𠵱，點解條片感覺怪怪地嘅？但又講唔出點怪！

當我拉低條片預備換時，突然有啲水漏出黎，再睇下條片入面，嘩，點解成攤「水」係入面㗎！？然後見到尿片上面detect 濕度嘅顏色線（indicator)竟然係入面！omg… 原來妹妹特登調轉左條片著，當我問係唔係自己調轉著，佢仲好proud 咁承認：喺呀！🤯

我一向好 positive 嘅老公仲要讚一句：妹妹真係好creative, 成日諗到人哋諗唔到嘅嘢～

敗家

今日去aeon 行街，好多人… 當我地行過一排扭蛋機嘅「危險地帶」時，通常我哋都會俾佢2個睇下d玩具，window shopping 一下… 

小朋友睇玩具時，通常我哋都會無聊碌下手機，突然間，見到妹妹睇睇下部扭蛋機，走過嚟指住我部手機，我都未get 到佢想點嘅時候，大小姐已經二話不說咁「搶」咗我部手機，然後對準個八達通俾錢位「嘟」落去，老公都忍唔住叫咗一聲「搞咩啊！」

當我回過神來，好彩個 payment 機未 input 邊㗎扭蛋機，如果唔係 charge 咗，真係吹脹！

呢個妹妹，呢個行為，真係有2個字即刻係我腦海中閃過：敗家 😒