４點３０分， alarm 響起來，大日子到啦~
好開心發現雨已經停o左啦，多謝上天！好快刷完牙，洗個面後，帶住手電筒，相機，仲有最緊要o既冷帽同保暖衣物都穿上身後，就落樓集合去了～
Santu 俾o左２杯熱水我o地飲，個身暖o左之後，就起行啦... 出面一片漆黑， 真係伸身不見５指，天氣都真係好凍，應該離０度不遠... 用電筒o既燈光帶路，唉，又係上山o既路，可能因為有些少高山反應同冷天氣，上唔夠５分鐘，心跳已經好快，亦都有喘氣，再多行o左１０分鍾，不斷o既梯級真係好攞命，停低休息o既次數漸多... 好多團友都有相似o既反應，都係心跳勁快，有 d 仲頭痛，大家都半條命o甘 chur 上山...
o係我又再一次停落o黎休息之際，亦都好 puzzled 究竟我幾時先可以上到山頂，趕唔趕得到日出之前登頂，定係究竟上唔上到山頂o既時候，Santu 及時出現，幫我’’咩’’晒所有行裝 (yes, again... 我都知好唔好意思）, 一手拖住我上山... 有好幾次，真係行到有 d 暈低o既感覺，可能 altitude 高缺氧加狂上坡o既原故... Santu 真係要拉我上某 d 斜位, 我諗，如果無o左佢，應該真係上唔切 Poon Hill 睇日出... once again, thank you for saving me!
沿住山路，因為尋日落過雨，再加上氣溫低，遍山o既草木都铺上一層厚厚o既雪，滿山都係白濛濛o甘，加上右邊隱約見到o既喜瑪拉雅雪山山脈，實在漂亮得令人窒息 (雖然，physically,都因為缺氧而好想窒息！）... 呢種 physically 同 mentally 都同時有窒息o既感覺，haha, 我諗，一生人都應該無幾多次可以體現到!!
６點多，已經可以見到第一線o既晨光，但係，似乎仲有一段山路，我問 Santu 究竟仲有幾耐，佢叫我唔好諗o甘多，盡力上就係啦... um... o甘講，即係會趕唔到睇咸蛋黃出o黎o個刻? 就係o甘，俾到我一舜間o既力量，我加快腳步，終於，發揮我最後o既 potential (!!), 成功o係日出前趕到啦～ 仲有時間影o下晨光o既相同雪山景。山上已經有好多遊人，太陽冒出山頭o個一刻，大家都併息靜氣, 驚嘆於眼前o既一刻，Poon Hill 山頂上，環繞住喜瑪拉雅雪山山脈o既日出景致，真係好好好好好靚... 雖然真係好辛苦，但係呢一刻，所有 physical pain 都已經被拋誅腦後，非常值得...
No Pain, No Gain!! Right?
就係o甘，我o地o係山頂玩o左個幾鍾，又影相，又玩雪，又跑跑跳跳，真係好開心... 最後，我o地呢團 Hong Kong + Macau Group影完大合照後，就滿足地落山了~
回到 Guest House, 早餐亦 ready 啦，嘩，我o地呢個 guide, 真係細心到無話可說，佢安排大家o係 restaurant 外o既地方，開一張長枱，俾我o地對住個超級無敵雪山景食早餐，大家都為呢個 arrangement 好興奮，唔怪得o甘多 Asian o係網上推荐 Santu 啦！
我o地一邊食野，一邊望住個雪山，真係漂亮得有 d 唔實在... 大家都好享受呢一刻，完全唔捨得走，但願呢一秒可以永遠停低，我o地永遠可以擁有呢個畫面同時刻！！
大家都好攪笑，完全唔捨得走， Santu 催o左我地幾次，我o地都不為所動，我攞住我杯 coffee, 靜靜o甘望住個雪山，真係以為自己o係瑞士！呢個景，真係LIKE 爆!
享受過後，所有o野都終需一別... 大家收拾細軟後，就出發下山啦。今日o既路程係最長o既一日，但會主打落山，所以，希望無o甘辛苦 (而且，落山我比較 ok)。
今日 lunch 前都係行入森林，其實，都係有好多上斜 lor!! 我o地一路上山，一路向 Santu complain, 話佢 ''呃’’我o地，又話只係落山，點解會有山坡架?? 我o地連要上幾級梯級都俾說話佢聽，haha, 真慘!!
上完第一個小山之後，我又再次 breathless... 團友叫我影相我都無精力過去，呢個 trip 後，我諗，我真係要 train up 下我o既心肺功能... 因為真係好差勁~ 跟住，我o地再行第２個山坡，上到一處好廣闊o既山丘，回頭一看，wow, 又係另一個令人難以忘懷o既景色，我o地身處山上，群山就在我o地腳下，仲要滿山都紅色 (with the National flowers), 藍天白雲，人間仙景，都不過如此吧?
我o地用 Panoramic 全景拍攝，影低呢個仙景，我亦都影o左好多 video, 都唔知呢輩子仲有無時間同機會 (well, or 體能）再o黎呢度，真係好想用現代科技，將呢一刻盡量留低 = )
接落o黎我o地再向山谷前行，Macau 團友開始唱起歌黎，’’在森林和原野是多麼的逍遙，親愛的朋友呀，你在想什麼...'' haha, 好舊好親切o既一首歌，應該係我o地小學時唱過的吧... 真係o係呢一刻唱出o黎，好岩 feel~
落山o既路唔太難走，相比起尋日，真係好輕鬆！午餐於某山谷中，今日食 Nepal 湯拉麵，唔錯唔錯，醫完肚，休息過後，再向我o地o既 Day 3 Guest House 進發! 下午落山o既路開始難走，好斜，而且好多沙石，一不小心真係會滑倒... 各人互相扶持，我o地吃力o甘沿住山型落山，一直走到山谷下o既河流，跟住，Santu 話要再上另一個山頂... 唔係o下嘩，點解唔起條橋呀，大佬~
無計，只可以頂硬上...
我o地去到一段平路時, 突然見到一個外國女孩子,自己一個好似好唔舒服o甘呆企係度, 仲想嘔,我o地上前問佢做咩,佢話尋日開始唔舒服,唔知係唔係高山反應定感冒,亦都有 d 發燒, 但係 so far 都 ok, 佢話可以自己走落去,佢o既同伴就o係前面, 佢只不過想慢慢行... Santu 真係好好,佢二話不說,就走入樹叢中, 攞起一枝樹枝, 切走個 d 枝葉,將條樹枝整到顺滑, 成為一枝行山竹俾個女仔可以行得方便快捷 d...同時亦都俾左 d 藥佢傍身... 個女仔都好感動~
前面o既路又o黎一段比較斜滑o既路, Santu 叫o左一個 porter 過o黎扶住我, 但落山o既路我真係幾有信心, 好想靠自己o既力量去完成, 所以, 拒絕o左佢o既好意... 但可能個 porter 受佢 boss 所托, 依然緊隨我o既左右, 好驚我出事, 真係 bair 一聲... 所以, 有 d 險要些少o既路段, 我都俾佢扶住, 等佢安樂 d.. haha, 突然間, 覺得自己有 d 似老佛爺, porter 就係我o既小貴子!!
最後一段路, 突然落起好大雨, 看住雨水打在樹葉地上, 面上都感到雨點俾我o既涼快, 真係好爽呀！ 終於到o左呢個 trip 最後一間 Guest House, 名叫 Snow Land, um... 應該係可以如其名, 見到雪山吧... 但今日太大霧, 聽日朝早再睇過啦~ 個 Guest House 前面有個大草坪, 我同 Tina 因為又係最後到達o既關係, 所以比較好o既2層主屋o既房間已經俾人撰o左, 我o地只可以睡在一間我o地覺得以前係養雞鴨鵝o既棚屋中, 從房外望, 真係以為係間公廁囉, 唉, 無計, 邊個叫我o地行得慢?!
到沖涼時間, 又係要排大隊, Tina 先沖, 我o地特意叮囑佢要沖快 d, 因為佢頭髮長,用水多呀! 外面落住大雨, 偶爾仲行雷, o係度排住隊, 同 d 團友吹下水, 望住個約隱約現o既雪山, 對面山o既梯田, 田地裡種o既蔬菜, 真係好過癮. 到我沖時, 好清楚o甘聽住雨聲雷聲, 同門外團友傾下大家o係香港做咩呀, 玩咩呀o甘, 呢個 shower o既 experience , 真係好 special...
最後晚餐就係炒辣雞, 味道真不錯, 飲埋最後o係山上o既 Nepal Milk Tea... 好滿足了... 晚飯之後, 大家睇o下 Hollywood and Bollywood o既 movies, 玩下 Uno 同 Candy Crush... 然後再出去 yard o既睇星星，嘩，o係山上，無城市o既光害污染，真係可以睇到滿天星星，好美的夜空，拾頭嘗試數一數天上星星既數目，完來，真係數唔盡架 = ) 突然間見到流星飛過，我同另一個團友立即許願，haha, 其他人都話睇唔到，一定係我o地眼花喎~
呢一夜， 大家都開始為旅程快將結束而依依不捨...
沒有留言:
張貼留言