今日一早醒來, 感覺充滿力量, 可能因為瞓得唔錯... 食過早餐後, 執拾好行山要用o既必須品後 (雖然有 porter 會幫我地 carry 個 backpack, 但係, 都唔好o甘陰公要人'咩'住o甘重o甘多o野上山啦), 我o地便將唔會用得著o既東東, 放係一個紅白藍袋, 寄存係酒店, 等我o地落山後再攞返...
10點鍾, 我o地個 Trekking Guide (名叫 Santu) o黎到 hotel 接我o地, 突然話俾我o地聽, 個團會有多2 Group 人加入, 一共 14 人... 嘩, 最初聽到, 我o地都有 d 不滿, 因為原本以為只係我o地3個人, Emily 比較 prefer 自己一 Group 玩, o甘多人, 唔係好係佢o既原意... 當然, 我o地諗諗o下, 多 d 人都係好o既, 只係得3個女仔上山, 真係有咩事都唔知, 山上亦都唔會有 reception, 到時真係叫天不應, 叫地不聞... okay, 14人, 安全 d 都好o既... 可能多 d 人會好玩 d 呢!!
Santu 帶我o地到o左o架 Shuttle Bus, haha, 都真係有 d 舊, 無冷氣o既老式中型巴士... 呢個 trip, 真係完全可以體現 Back to Basic... 住又 basic, 食又 basic, 坐車都係 basic... 不失為住慣城市o既大家一次好好o既 experience~ 上到車後, 團友都漸漸出現, 有1 Group 係由香港o黎o既, 一行4人, 同我o地差唔多年紀; 另一 Group 就係o係澳門o黎o既, 有7個人o甘多, 25, 26歲, 好 young 呀~ 原來佢o地有幾個人都係大學同學, 讀同一個 major: Tourism... 所以經常去 exotic o既地方... 其中一個更加係 Freelance 導遊... 大家都識聽識講中文, 亦都唔係被 spoiled o既港仔港女 (去得 Nepal, 都應該唔係o既, haha), 希望可以夾得到, 一齊經歷一個難忘o既旅程~
車程約一個多小時, 我o地就到o左起點... 1個導遊, 7個 Porters 再加14個團友, 22人浩浩蕩蕩o甘向大山出發... 先係經過民居, 再過o左條鐵索橋, 我o地輕輕鬆鬆o甘行o左1個鍾到, 就到o左一間餐廳, 位於河畔, take 我o地第一個 break... surprisingly, 食o既o野都真係唔錯, 先o黎一杯令人精神為之一振o既 Lemon Soda... 跟住, 有碟貌似印尼炒飯o既炒飯, 再o黎有鍋 Cheese Macaroni (好西化下喎!), then 有清下腸胃o既蔬菜... 最後, Santu 好細心o甘帶o左幾種水果... o係呢幾日o既行山行程, 發現佢o地真係好鍾意茶, 每一次食完飯, 一定有 Tea Time~ 有 Black Tea, Mint Tea, Milk Tea, Ginger Tea 等飯後飲品, 當然, 以我呢個奶茶王o黎講, 一定係飲 Milk Tea 啦~
食飽後, 再上路了... 因為係正午, 所以都好曬同埋熱...行得比朝早辛苦. 經過一 d 本地人o既小房子， 設計無咩特別, 但係有幾間外牆好用心o甘用d好鮮艷o既顏色, 有粉紅色, 藍色, 黃色... 我好喜歡呢 d 屋仔... 好浪漫o既感覺~ 山野田間, 尼泊爾小孩子好開心o甘o係山裡跑跑跳跳, 小動物如小雞, 小鴨, 小狗, 都好悠閒o甘走來走去,或者係睡覺... 成個地方俾我o既感覺真係山裡的一切, 都係好自然, 全無世俗壓力, 人們o既生活都係無憂無慮... 係唔係, 每一個住係呢度o既人, 都可以真真正正享受快樂??
一路上, 享受住藍天白雲, 翠綠o既山野林間, 高高o既山峰同埋清澈o既流水... 間中, 仲有驢群馬群趕路. 呢一刻, 真係完全忘記生活上o既大小煩惱, 感受住世界o既浩大, 凡人o既渺小...
Santu 講過, 第一日o既行程係最輕鬆o既, 大概行3個小時左右, 亦都唔會有好多斜坡... 第2日就會開始o黎料, 要6個鍾, 仲要不停上山, 因為 Day 3 要上到 3300 米o既 Poon Hill 睇日出... 第3日會開始下山, 而亦都係最長o既 hiking... 要8-9個鍾到... 第4日就只會係 Half Day, 便回到 Pokhara 啦... 只係聽到 Day 2, Day 3 o既 Schedule, 都暈得一陣陣... 呢個 Trip 之前, 都無咩點 train, 唉, 希望可以順利完成吧~
以 Santu o既 Schedule, Day 1 應該無咩大難度... 但 Emily 因為旅行前唔舒服, 呢個 Trip 期間仲係恢復中... 所以, 原本簡單輕鬆o既行程, 對佢o既身體, 都真係幾大o既負擔... 雖然大部分都係平路, 但係, 佢都走得好吃力... 每20-30分鐘 就要抖一抖, 上斜時, 更需要 Santu 拖住上山... 我同 Tina 睇到o甘o既情況, 心裡都好擔心... Day 2 Day 3, 走o既路要比今日難頂10倍... 好驚 Emily o既身子承受不到， 點算好??
結果, 原本3個小時o既路, 我o地3個足足行o左 5個半鍾... 睇到 Santu 都覺得好無奈... 鼓勵 Emily 用意志力盡力完成... 到最後個段路, 太陽都正在落山, 天更落起雨, 我同 Tina 坐o係一個小村莊外o既石梯等 Emily, 我倆安靜o甘望著山裡o既小屋o既小煙囪, 因為人們開始做晚飯而冒出縷縷輕煙, 雨點打在面上... 感覺, 好不真實... 我是這大山裡的一份子嗎?
天黑前, 終於到我o地當晚要住宿o既 Indra Guess House... 團友們早已到達啦... 亦已經沖完涼... 我o地3個, 去o左安排好o既房間放低 backpacks 後, 就快快手手落樓下沖涼... 因為已經好累... 山裡o既 Guest House, 同 Pokhara o既 Hotel 差好遠... 設備係超簡陋, basic 到唔 basic, 木板牆, 隔離細聲講咩都可以聽到, 2張只有白布同枕頭, 連被都無o既床... 乾唔乾淨... ummm.... 都係唔好睇, 唔好諗啦... 瞓一晚o者... 是但啦~
沖涼刷牙開大細, 都係o係 outdoor o架... 夜晚, 真係可以一路刷牙, 一路抬頭睇星星o架... 好有 feel~ 水o既來源, ummm... again, 都係唔好問, 唔好諗啦... 沖涼室... well, 係無燈o既, 但係都好o既, 暗暗地, 唔好睇得o甘清楚, 仲安心!! 我o地3個 teamwork, 一個沖涼, 一個攞住電筒照住入面, 一個負責攞衣物用品... 真係缺一不可呀~ That's real teamwork!!
攪掂完個人衛生後, 即刻趕上樓食晚飯, 團友們已經在開懷地唱歌, 因為隔離枱有一個外國人生日, 大家就對唱起來...氣氛真好... 晚餐係 Nepal 碟頭飯, 有 potato, veggie 同埋我喜愛o既 Nam = )
食飽休息中, Santu 拿出一杯 Buffalo Milk俾我o地飲，又有 d 類似 potato o既小食俾我o地試... 又真係幾好食，幾特別喎～
最後, 回房瞓覺前, Emily 就要決定究竟聽日要唔要继續行程，因為佢身體情況確實唔太好，要再往山上行，佢自己都唔係o甘有信心，雖然 Santu 話上山o既路可以以驢仔代步，但落山就一定要自己o黎，因為驢仔落山會好危險... 但我o地將要落山o既山程，都唔簡單... Emily 認真考慮過後，決定唔再上路，提早結束行程... 聽日返回 Pokhara 休息... 雖然好無奈，但係對佢身體o黎講，係最安全o既安排..
雖然有 d 遺憾, 但人生，有時就係o甘...
希望在明天呀，各自努力吧!
沒有留言:
張貼留言