唐唐又o黎料

今日睇到一篇有關唐英年的報道,好搞笑...

From Appledaily @ March 7, 2012

<志雲大師 07年噏中私生子>

唐唐日前接受無綫電視專訪，竟然默認有私生子，全城再度掀起私生子討論熱潮。但原來最有先見之明嘅，竟然係啱啱過咗檔去商台嘅陳志雲，心水清網友發現，唐唐 07年接受《志雲飯局》訪問時，已經問咗唐唐有冇私生子；如果志雲大師轉行，應該發過麥玲玲同蘇民峰。

「有都唔話得畀你聽」
志雲大師例牌會喺節目尾聲送禮物畀嘉賓，佢當年原來揀咗一套 8隻有大有細嘅 TVBuddy畀唐唐，因為唐唐係一個家庭觀念好重嘅人喎。好戲在後頭，志雲大師即場點算公仔數目後，陰陰嘴笑話：「唐老太、唐生、仲有你一家四口：三個千金，一個公子，啱唔啱數？」然後煞有介事話：「你出面冇其他仔女嘛？」遭突襲嘅唐唐即時語塞，一貫四萬笑容話：「如果有，都唔話得畀你聽……哈哈哈哈……」

當年觀眾可能當做笑話一則，聽完就算，但家睇番轉頭，唐唐嗰幾聲「哈哈哈」似乎係以笑遮醜，唯一值得慶幸係佢當時冇否認，否則今日就斷正。兩次都係衰喺無綫手上，唔通唐唐同無綫八字唔夾？
志雲大師噚日被問到點解咁洞悉先機時，笑笑口話都幾乎唔記得有問過咁滯。

私生子浮面，難得唐太不離不棄。唐唐噚日喺微博上載唐太招牌笑容照，仲寫上「多謝妳與我並肩作戰」，呢啲老婆去邊到搵吖！