《梁振英，香港人真係太過俾面你》

在 Facebook 看到這篇文章 @ September 30

Author: 陳詠燊

《梁振英，香港人真係太過俾面你》

昨天與一位前輩聊天，才説到：香港人其實從來都很易管，因為我們都只愛錢。大陸正在溫水煮蛙？根本個個都知，無論中環大班定天水圍師奶都知，只不過一天還有飯吃，一天還有錢賺，都會和一啖口水吞咗佢。

因為生存才是最緊要。

跟著這幾年，政府越踩越過，自由行破壞香港秩序、大陸人炒高樓價、搶學位、搶奶粉、高官囤地自肥、國民教育、阻港視發牌、假普選⋯

以上的，大家都不滿，不過以香港人搵食大晒的性格，其實好多原本都可以當睇唔到，但為甚麼都會變成心中的一道怒火？

因為政府踩中了香港人搵食的最底線──尊嚴！

自由行破壞香港，你叫我們尊重別人隨街大便的權利；香港人的資源被搶，你叫我們包容；高官私相授受，你話誤會；國民教育明明洗我們下一代個腦，你話唔係；港視開唔到台，你賴「一男子」；去到講了N年的普選特首，你一早預設了答案，仲厚臉皮出來話「有相有量」，之後還利用我們納稅人的錢去賣廣告，話「有票，真係唔要？」

更難頂的，是特首還自組Fans團，縱容所謂「愛港力」與小丑之王周融橫行，再夠膽用「個人名義」支持一個全世界都知是假，是篤數，是簽個名有豉油送的「反佔中」簽名。

香港政府真正的罪名是，當香港人白痴。

窮都可以頂，但尊嚴點都唔可以被踩。

士可殺，不可辱。

於是這幾年來，香港人都谷住道氣，大家都只差一個爆發點。

隨著星期日中午第一個催淚彈爆開，一切都爆了。

一個自以為高高在上的人，才會以為用武力就可以消滅一切反對的聲音。你覺得香港人就在你腳下？香港人就爆給你看！

之前的，是學生運動，而昨晚出來的，卻大多數是要搵食，平時唔願出聲的成年人。

為甚麼他們都願意走上前線？

因為他們要保護學生，亦即是保護我們香港的未來。

愛香港，所以才走出來。

梁振英，你要幾萬香港巿民，成晚唔瞓來挑你一個人機，香港人真係已經太過俾面你。