香港人係o吾係真係o甘得閑？

有時，見到呢 d 新聞同對話，真係o吾嘆氣都o吾得... 唉 ~

From Appledaily @ November 2, 2012

呢期老左圈子最hit話題莫過於「港獨」，齊齊對住支港英旗噴口水。前港澳辦主任魯平接受《紅早》訪問發晦氣，話唔鍾意做中國人嘅人咪申請退籍囉，橫掂中國有13億人口，少一個唔少！網民即時起哄話要退中國籍，鼓吹城邦自治嘅陳雲就繼續挑機，促請阿爺順應民意搞「退籍專櫃」，隨時打蛇餅，入境處真係多得魯平唔少。

陳梓進：退籍唔係咁易

根據中國國籍法，退籍唔係咁易，起碼你要精神健全，加上移咗民、係外國公民嘅配偶或子女，或者「其他正當理由」，先有資格，報名費盛惠575蚊。入境處前兩年收到119人申請退籍，絕大部份移咗民。至於咩為之「正當理由」，就要視乎個別情況。

陳雲講明要留低同中共鬥長命，所以唔會退籍，但佢話好多香港人都想轉投英籍，相信魯平發噏瘋會刺激「退籍潮」，「夠膽就整個counter，排長龍都似」。facebook群組「我哋係香港人，唔係中國人」因為舉港英旗紅爆，累積兩萬幾人like。發起人陳梓進堅想退籍，早前就此問過入境處，先知退籍原來唔係咁易，噚日話：「問心，有邊個香港人想做中國人？」

民主黨FBI涂謹申話中國簽咗《減少無國籍狀態公約》，唔會畀未有其他國籍嘅人申請退出中國籍，除非有人成功入到英國或其他國家嘅國籍，先至有資格退中國籍，大鬧魯平講嚟「多餘」；工黨張國柱就叫阿爺反省香港人點解不滿，否則贏咗場交，輸咗頭家，有乜謂？