第2日, 我o地o既行程就係去(Twelve Apostles) 12門徒石啦~ 呢個景點, 真係好期待. 因為成日o係電視劇呀, 電影中睇到呢個地方, 一定好靚... 但係睇靚景, 係要付出代價o既, 因為只係開車, one-way 都要3-4粒鍾... 真係諗到都頭暈...
但沿途我o地開o既路, 叫做 Great Ocean Road (大洋路), 呢條路係非常出名o既自駕遊路段, 因為沿住一望無際o既海洋，仲有曲折o既海岸线，高山, 懸崖同埋奇特o既地貌可以遊覽... 做乘客o既真係好 enjoy, 因為可以不停影靚相同欣賞風景, 但當然, 開車o個個, 真係好考定力. 因為當你o既 travel buddies 不斷讚嘆風景之美o既時候, 為o左安全, '司機大佬'仍然要高度 focus, 好小心開呢條又彎又窄o既路...o甘, 有時有 d scenic spots, 我o地都會停低, 欣賞o下個無敵海景~
其中一個休息點真係超大風, 我o地開車門都要用好大o既氣力... 出到去, 真係要著返件厚o既外套, 因為風速勁o既地方, 氣溫都會下降... 我o地行到去海邊, 真係好似會被風吹得動... 頭髮唔駛講, 已經亂到一餅o野o甘啦... 但係望出去遠處, 見到白頭浪, 風呼呼聲吹到眼水都標埋... 此地雖然好想久留, 但真係不宜久留也!
差唔多到目的地時, 竟然落起雨來... 我o地唯有開慢小小, 安全為上呀... 結果, 成程路, one-way 就已經用o左5個鍾... 可能停中途景點再加食lunch同埋落雨, 我o地去到都4點幾...o甘亦都意味住, 我地可以o係黃昏時份, 睇到不一樣o既景色: 日落之美 = )
一落到車, 風依然好大... 再加上落雨, 吹到人都企唔穩, 把傘都吹到就o黎反!
係o甘''惡劣'o既環境下... 又好得意喎, 人o既官能感覺, 可能受到刺骨o既强風同低溫下o既刺激所影響, 個一刻, 望住12門徒石個 view, 真係覺得好神聖,時間停頓o左o甘. 加上日落o既背景, 望住海浪衝擊住巨石o既浪花...雖然大風同凍到個人開始有d唔舒服, 但見到夕陽o既餘暉係厚厚o既雨雲中透出''龍友''所謂o既耶稣光再映射到巨石中, 真係好想永遠保存呢一刻...
唔怪得, o甘多電影係度取景啦!! 真係一生人點都要o黎一次o既地方!
沒有留言:
張貼留言