君子與淑女

From Appledaily @ Feb 22, 2012

<惡啃熟女　顛覆淑女>

「危險經已在前面，凌亂裏踏上邊沿！」唐生大地震餘波未了，一對「君子」、「熟女」政壇異獸突然又話要殺入小圈子，當中以「熟女」葉劉最激動人心。佢前晚幽幽吐出一句，特首之戰若由佢同曾鈺成對決，「相信一定係君子與淑女之爭」，不但衝破了豬狼對戰嘅鬱悶，更顛覆咗世人對君子、淑女嘅睇法，可謂一石激起千重浪！

難忘漠視民意嘅嘴臉

八方同好多人都一樣，最初以為自己聽錯，心諗唔通葉劉話自己係「熟女」？還是因為佢個名有個「淑」字，所以食字夾硬話自己係「淑」女？如果佢真係覺得自己係政壇淑女嘅話，大家真係會覺得好驚嚇囉。

佢當年以掃把頭造型「精忠報國」強推 23條，不惜出賣香港人嘅人權同言論自由，當佢掌握咗權力之後，對民意嗰種輕藐嘅態度同嘴臉，無論佢點改髮型、點「洗底」都好，人民都係不會忘記㗎！

網民好明顯唔妥葉劉自稱「淑女」，博客林忌即刻改圖，將電影《窈窕淑女》改咗做「秒殺熟女」、有網民就將葉劉個樣 key咗落紮孖辮嘅清純學生妹度，問大家可唔可以接受呢個經已唔係掃把頭嘅佢。 well，八方真係接受唔到囉！

推銷 23條時面目猙獰

牛棚有班藝術家噚日搞咗個《特首造像．中國製造》藝術展，藝術家陳紹綿就畫咗昂山素姬畫像去表達呢個主題，希望香港可以一人一票選特首。陳紹綿話葉劉同昂山素姬差得遠，葉劉推銷 23條時面目猙獰，反而余若薇就有少少昂山嘅氣質。所以呢，淑女同玉女一樣，係唔可以亂認㗎！