善長人翁

今日阿仔有啲心事咁，原來佢o個班要換班長啦⋯ 班主任下學期啱啱轉全日制後，就揀咗佢做班長，家長日時話因為佢做嘢有交帶，爽手，同埋搞得掂自己嘢😂

不經不覺就做咗差唔多三個月，佢都好鍾意做班長，因為可以摘名同入教員室，好勁喎！

所以，今日要親手將個班長牌交俾下一個小朋友時，佢應該好唔捨得，但都係一次好好嘅經歷～

然後，我問佢，做完班長之後，你有咩班務呀？佢就答：我做善長呀。

我心諗，吓，善咩長呀，東華籌款呀？

我問：咩黎㗎？

佢話，膳長呀，食午餐時，派完飯負責寫低小朋友食咩餐呀⋯咁都唔識！

Oh… sorry 呀，阿媽我真係第一次聽到呢啲職務😂

反轉

妹妹豬不嬲都係唔按本子辦事嘅人，我諗，佢大個咗都唔會好 follow rules … 其實呢方面，係有啲似後生嘅我 😂

話說今日喺廳，妹妹話要痾尿尿，但當我過到去佢身邊，諗住換片時，𠵱，點解條片感覺怪怪地嘅？但又講唔出點怪！

當我拉低條片預備換時，突然有啲水漏出黎，再睇下條片入面，嘩，點解成攤「水」係入面㗎！？然後見到尿片上面detect 濕度嘅顏色線（indicator)竟然係入面！omg… 原來妹妹特登調轉左條片著，當我問係唔係自己調轉著，佢仲好proud 咁承認：喺呀！🤯

我一向好 positive 嘅老公仲要讚一句：妹妹真係好creative, 成日諗到人哋諗唔到嘅嘢～

敗家

今日去aeon 行街，好多人… 當我地行過一排扭蛋機嘅「危險地帶」時，通常我哋都會俾佢2個睇下d玩具，window shopping 一下… 

小朋友睇玩具時，通常我哋都會無聊碌下手機，突然間，見到妹妹睇睇下部扭蛋機，走過嚟指住我部手機，我都未get 到佢想點嘅時候，大小姐已經二話不說咁「搶」咗我部手機，然後對準個八達通俾錢位「嘟」落去，老公都忍唔住叫咗一聲「搞咩啊！」

當我回過神來，好彩個 payment 機未 input 邊㗎扭蛋機，如果唔係 charge 咗，真係吹脹！

呢個妹妹，呢個行為，真係有2個字即刻係我腦海中閃過：敗家 😒

妹妹的生日歌

妹妹今年第一年返學（唔計返嬰院），o係屋企附近返N 班，so far 都幾鐘意返學，返到屋企有時會唱吓老師教佢嘅歌仔，雖然仲係「五音不全」嘅 level, 但佢自己好 enjoy!

之前婆婆生日，到唱生日歌環節，佢聽到我地唱，可能認得 d melody… 突然佢好開心咁唱埋一份～ 但每次唱到 “ Happy birthday to you… happy birthday to you…” 佢句 to you 好似個發音好奇怪⋯⋯ 我地就叫佢 solo 一段… 呢個小朋友唔似哥哥咁怕羞，仲好 proud 咁大大聲唱： Happy Birthday 生日，happy birthday 生日！

個一刻，當我哋聽到「真相」之後，真係笑到肚都痛😂😂

陪訓

陪訓同 tum 訓覺都係每一個父母嘅必經過程… 有幸有能力可以令自己小朋友快速入睡嘅，真係「三生有幸」😂，因為，只有小王子小公主訓著之後，父母先可以有真正嘅 ME TIME～

阿女好「痴」爸爸，猶其喺訓覺嘅時候，可能因為爸爸個膊頭好舒服，好有安全感！我同婆婆都無呢個令大小姐安心訓著嘅 skillset… 所以通常都係爸爸tum 佢訓…

但老公最近「投訴」，話咁落去唔得，太依賴佢，佢條腰都唔好，最近仲扭親手，所以佢開聲叫我「訓練」多啲同阿女訓 🫣

今日下午，我「隊」o左支210ml 嘅奶俾小公主後，就叫老公快啲出去，免得見到爸爸o係到扭佢抱訓；老公臨出房門一刻，突然閃過去窗口，拉實埋個窗簾，我順口話：唔駛啦，少少光，得㗎啦！

佢即刻義正嚴辭講：有時，就係因為一條光，令佢唔訓！如果佢訓唔到，唔好賴我！

哈哈… 專家果然係陪訓專家 💪🏻

糖與C

大家係咪好疑惑咩叫糖與 C? 其實就係一啖砂糖一啖屎 😂

妹妹成日都可以做啲激到屋企人好嬲嘅事，訓地啦、推嘢落地下、lur飯lur水、打人等，總之數之不盡… 尋晚，我鬧完佢唔可以掉自己食飯隻义落垃圾桶後，佢居然發脾氣出去廳食自己隻拖鞋鞋底！

呢樣野真係超愈咗我嘅底線⋯⋯ 我忍不住重罰咗佢，結果，當然係喊啦。我哋不嬲 timeout 會去corner ，要求佢數30秒，再講出應該做返嘅行為… 但呢個超硬頸小朋友，完全口硬，點都唔肯就範，激死我！

就係咁，俾呢個女一日激幾次，真係無符，邊個叫係自己生出嚟呀～

但今朝，叫佢起身返學，佢突然爬去我腳上面訓係度，然後自己細細聲講：我鐘意媽媽 ❤️

嘩，真係冧晒，咩都唔嬲！

獨指神功

今晚陪妹妹訓，平時為咗令佢快啲訓著，都會盡量唔出聲、關曬所有燈…

安靜咗一輪，當以為大小姐已經入睡，突然係漆黑之中，見到有一隻小手指舉起咗，當吓仲疑惑緊究竟係咩東東… 

然後，就係小姐把BB聲講：鼻屎呀～

Omg, 我跟住拖住呢隻小小手指仔，果然，真係有粒大鼻屎係上面 :p