每一晚希希訓覺之前， 都會叫我o地講一個自創o既故事， 今日我就同佢講輪到佢啦， 叫佢自己講個故事俾我聽！佢最初唔肯， 扭扭擰擰， 最後我堅持， 佢就唯有開始佢o既創作了！我好期待佢o既創作係點o既~
故事o系係屋企開始，佢話佢要去街街， 出門口啦， 希希話: "我约o左個女仔呀!" 聽到呢句, 媽媽我即刻心頭一酸， 衰仔, o甘细個约咩女仔o者... 然後佢繼續: "我约o左個女仔叫媽媽!" 當然, 媽媽我又即刻 lum 晒 （哈哈）。。。
好，返返去希希o既故事先。。。
然後個女仔出o黎啦， 我要拖住佢o既手一起行 （又lum一次)... 我o地搭飛機去森林玩, 玩完之後呢就返屋企啦, 夜晚就食晚饭啦， 食完晚饭就玩一陣玩具， 差唔多訓覺爸爸就同我去刷牙， 然后洗脚， 再上床同爸爸妹妹 say goodnight，然后同媽媽一起訓覺啦。
The End~
我問佢, o下, o甘就完啦? 佢仲好 proud o甘話, 係呀, 係咪好好聽呀 = P
小朋友o既故事， 系o甘上下啦， 感覺好寫實... 但又好可爱！
妹妹不經不覺已經出左世七個月啦，阿仔so far 都算係一個「稱職」嘅哥哥，好就妹妹，亦都好少呷醋（on the surface)，同埋好幫屋企人手，對於一個四歲小朋友黎講，已經好乖架啦 ❤️
當然，小朋友始終都係小朋友，有時情緒唔好，易左發脾氣同嗲咗都係事實，始終都係由一個人獨佔爸爸媽媽到有一個三唔識七嘅BB黎分享左自己最愛嘅人嘅愛、陪伴同時間，所以作為媽媽，我有時會特登誇張d同阿仔表達我嘅愛，同如果妹妹唔乖，會係佢面前「嚴正處理」，希望俾佢知道妹妹黎唔係要同佢搶野，而係陪伴佢嘅手足，一輩子會同佢相伴嘅人...
相親相愛係我同我老公對佢2個嘅期望！
有時，我都會心裏面諗，究竟阿仔會唔會唔鐘意妹妹，但係我哋面前唔敢反映出黎？因為有時候佢發脾氣時會話：我唔要妹妹、唔好帶妹妹出街等...
今日下午 work from home 時，妹妹大爆屎，成身都係，結果要的入厕所沖身，可能因為未試過的住佢企喺浴缸，妹妹好驚所以喊，好surprised, 阿仔第一時間衝過嚟，好溫柔咁同妹妹講：妹妹，唔駛驚，好快沖完啦，哥哥係度～ 個一刻， 媽媽我聽到後好感動，阿仔真係好緊張妹妹...之後我抱住妹妹出廳，阿仔仲一路輕輕拍拍妹妹心口，叫佢：搞掂啦，唔驚啦！
好希望佢兩兄妹可以一路都相親相愛，互相扶持！
妹妹不經不覺已經4個幾月啦, 由o岩o岩出院細細粒要我地擔心唔夠磅o既奀B, 到而家擁有一雙大肥脾的可愛BB女! 呢幾個月無想像中o甘辛苦, 除o左少o左睡眠時間之外， 妹妹都算容易凑。。。希望乖乖的性格可以继续维持... lol~
上個禮拜，因為喂奶換邊時唔小心用力，所以扭到膊頭，發唔到力同小小郁都會好痛，搞到抱 BB都好吃力，亦都怕抱住突然間無力跌到妹妹，唔太敢抱她， 一個喂緊母乳但唔可以抱BB的媽媽，主要功能完全用不上，感觉都真係好無奈...
好彩有我隊友（親愛的老公）的帮忙，每一次要抱 BB， 他都好醒目的走過黎幫我做‘’運輸機’‘， even 晚上凌晨時分， 妹妹一喊，我一拍下正在熟睡既佢， 佢就會自動波o甘起身幫我抱妹妹落o黎我個喂奶墊， 見到佢訓到甘舒服時， 有時真係唔太忍心叫醒佢。。。 但大小姐肚饿要食奶都無辦法...
生完二胎後， 真係有同老公係一個 team 既感覺， 而家處理兩個小朋友既事情，很多時都要分工合作， 一個搞哥哥，一個搞妹妹， 分頭行事， 都需要互相 cover， 好似今次扭親手時，更加覺得老公好重要、 好好， 有一個神隊友真系非常非常必要~
多謝老公的 support，願我地兩個小朋友健健康康開開心心o甘成長啊！
