大嘅細嘅都係讀衛理堂，呢間幼稚園好有愛，上至校長到老師、職員和工友姐姐，都好用心去照顧同愛護小朋友，可以喺呢間幼稚園長大，係佢地嘅福氣！
今年，阮校長退休了。服務左學校30+年，真係少啲心力同毅力都唔掂，家長們都好唔捨得佢，可惜妹妹唔可以係佢手中攞畢業證書😣
聽日學校結業禮，原本打算返去陪妹妹攞「家多一點讚」奬狀，亦可以親自多謝一下校長。好可惜，教育局竟然今日中午宣布，因為惡劣天氣關係，聽日停課一日！！
有冇搞錯，平時又唔見反應咁快，今日只係紅黑雨，邊個可以預料到聽日都係呀！
呢個決定，亦都令校長最後一次結業禮無咗，好遗憾（至少我嘅感覺），唉 😮💨
無論點都好，希望阮校長退休後生活順利，一切眾生安好🙏🏻
從Tyler 小時候，我同佢有一本小書仔，係代表我同佢兩個嘅，故事係講一隻 baby owl, 自己一個到世界各地飛翔，途中見到好多動物，飛過森林、河流、南極同北極！
最後一頁，就係講 baby owl 環遊世界後，回到屋企，同媽媽攬住一齊… 阿仔细個久唔久就會攞呢本書出嚟，叫我同佢一齊睇，然後又要我好似mommy owl 咁抱住佢，其實，都好 sweet 💕
妹妹都知有呢本書嘅存在，亦都大概知道呢本書係佢阿哥同我嘅「關係」。今晚，妹妹係哥哥床頭攞住本書，特登話係自己同媽媽嘅故事，激佢阿哥…
阿哥有時又唔 come 激，同佢 argue： 唔係呀，係我同媽媽㗎！
阿妹又醒，flip 去最後一頁話：咁我地一齊同媽媽啦！
Tyler 回應：唔得，個頁得2隻貓頭鷹咋，係我同媽媽，無你份！
兄弟姊妹係唔係就係咁… 咩都爭一餐 😅
雖然個一刻，我的確甜在心頭 💕
仔仔不嬲都好被動，內向，而且無咩信心。今年二年班下學期，學校有個管弦樂團試音，要自選一首歌去拍片，佢學咗大提琴一年，我叫佢去試吓，可惜少爺非常抗拒，話自己拉得唔好，唔要試，好堅決！
作為媽媽嘅我，當然好想佢去試吓，但亦都了解唔可以迫，老公都話怕迫到有反效果⋯⋯
似乎，阿仔對於呢啲入校隊啊，團體嘅表演、比賽，一啲興趣都冇，寧願赋閑在家 hea 😰
今日臨訓前，阿仔好開心咁係書包攞咗個 pin，原來係第二年學校嘅「優秀學生」金牌 pin 仔，佢仲好 proud 咁話：「媽媽，今年個 pin 靚咗好多呀！但老師話，下年更加難攞㗎…要考得好，做多啲服務先可以！」
然後，我隨口講咗一句，咁下年要攞，唔通要入校隊？
之後，佢就諗咗一諗，同我講：「咁我嘗試吓可唔可以入到 AI 校隊啦！」（話說佢抽到可以參加暑期嘅 Lego Education Spike Prime summer camp)
我個一刻心諗，嘩，阿仔竟然會咁主動，個 gold pin 真係唔講得笑，魅力沒法擋 😆
上個月，陪小朋友去食麥當勞，午餐時段通常都好迫人，我哋會分頭去搵位。我見到有家人差唔多食完，就企喺枱隔離等，等咗5分鐘，終於走啦… 我就叫阿仔過嚟坐… 同一時間，有個伯伯以為我地只係2個人，所以就坐低隔離個2個位… 我就同佢講：「唔好意思，我哋4個人坐！」
個伯伯即刻用手指指耳朵，我接收到嘅 message 係：我聽唔到你 up mud… 我坐低咗，你奈我唔何！
嗰一刻，我只感覺到佢扮聽唔到，要打尖搶位，所以下意識，反咗佢白眼，jip 咗佢一聲！佢隔籬個老婆婆都唔太好意思，同我講，佢聽唔到嘢，對唔住。然後同伯伯做手勢，意思係人哋4個人，再搵位。
當下，我感到無比咁唔好意思，我以人性嘅「惡」嚟諗人哋，唉，非常慚愧 😔
其實，可能呢個世代太邪惡，睇得太多 negative 嘅嘢，心都變得冷漠，過於保護自己。
記錄呢個事件，作為警醒吓自己！
本家少爺年紀不小，但戒夜尿呢回事，似乎有啲難度⋯⋯ 上年三月嘗試戒片，但足足一個月，都係換床單被鋪次數多到工人姐姐都搖頭，結果，放棄咗。
之後去睇左專科，醫生話呢啲無得急，只可以等機能成熟，或慢慢train 潛意識，睇吓會唔會好d。
上個禮拜，有一晚突然拍我（在睇手機中），話陪佢去厠所… 當時媽媽我有啲感動，終於好似有些少進步…
今晚，老公沖完涼，我哋出咗廳傾左陣計，然之後我返房瞓先，去廁所，見到2大灘水，即刻「問責」，打算問吓老公搞咩⋯⋯ 然後佢入到廁所，都好 confused.. 我地突然見到 ”come” 咗嘅廁板，嘩，都有一大灘水，之後就相視而笑：「係尿！」
結果， further verify 之後，廁所行到床邊都有水迹，我哋不但無嬲，內心仲有少少開心：少爺終於算係第一次自己夜晚行去 all 夜尿啦～
PS. 同老公講笑話，如果阿仔all 完，行返床，被自己地上嘅尿 sin 親，呢個畫面，係何其 ridiculous 😆
Tyler 第一次參加實體嘅校際朗誦節 (上一年係 video), 今朝一早去文化中心報到，第一場有26個男仔，其實篇詩詞好短，一分鐘內都可以完成。
阿仔不嬲都唔係鍾意表達、表演嘅人，present 同朗誦完全係佢「憎」嘅 tasks… 所以我同佢報，佢都唔係咁想去，但我話，今年已經俾咗錢，一定要去…
佢係18號，即係要聽17個一模一樣嘅詩詞先到佢，我覺得呢個先係大挑戰 🤣 第一位小朋友出場，睇佢一d都唔緊張，但就以廣東話嚟朗誦一首suppose 係普通話嘅 poem 😅 有啲小朋友就超細聲到真係聽唔到… 至於 Tyler, 當然唔可以用出色嚟形容㗎啦，但，以媽媽我認識嘅佢，已經 out of 我嘅 expectation… 做得非常好👍🏻 佢至少將我哋一個月內教佢叫佢做嘅 actions 全部做齊：大聲、速度慢、有啲抑揚顿挫（當然佢係做唔到人地好浮誇個種，佢之前拒絕學 YouTube， 話唔鍾意咁誇張😅）、望觀眾而唔好望地下等。
佢個組有2場，大概50個小朋友比賽，佢攞83分，比上一年進步咗… 有時候，做自己唔擅長嘅事情，出盡力，亦都做到 self best, 同其他人比較，可能都好中庸，呢個係我今日嘅體會 😆
Overall, 呢個校際朗誦節，對阿仔都係好好嘅 experience, 佢話佢學到點樣係緊張中控制自己心情，亦都唔好比其他小朋友嘅動作影響（佢話怕跟左其他人d動作😆）。對我呢個內向仔仔嚟講，今日嘅朗誦體驗，一d都唔容易，我好 proud 佢今日一一做到練習嘅元素，雖然係評判眼中唔係出色，但係爸爸媽媽眼中，你已經做得非常好，叻仔👍🏻
Side note:
香港小朋友真係參加好多比賽，就呢個朗誦節，身邊已經識好多人參加。有啲趣事想紀錄下：
1. 話說阿仔同班同學參賽，當小朋友朗誦完，老師同佢講：你表現得好好，可惜你背誦嘅唔係我地呢個組別嘅詩詞，所以唔好意思，我哋要 disqualify 你 。 應該係媽媽擺咗個大烏龍… 童年陰影莫過如此 😨
2. 另一個朋友仔，不嬲都好有主見，佢阿媽同佢報名時，以為好似上一年咁，係 video， 點知covid 後，回復返實體，結果比賽前幾日，佢同媽媽講唔會去，因為佢無問過佢，佢亦無應承過… 咁係唔尊重佢… 結果，真係無去 😅
d人成日話呢一代小朋友享受至上，唔捱得… 但又老實講，我哋阿爸阿媽都成日批評我哋唔捱得…
尋日，跟我個高層閨密（😆）去 member-only 個 d high class clubhouse, 先係去食個正正法餐… 前菜係牛舌、主菜 beef wellington, 甜品就係白松露 pudding, 食到好飽… 之後，再去 wet facilities, 我原本以為係去游水，點知，原來除咗游水之外，仲可以浸溫泉（當然唔係天然泉水），但個 hotpool,加個無敵維港海景，真係luxury 嘅享受😎 hotpool 隔離就係冰池，如果唔怕凍，可以過一過冷河，我friend 話，成日黎，感覺皮膚都滑咗不少～ 其他設施有 sauna 同 private resting area and benches, 得閑嚟 hea 下，人生都美好啲😆
我哋5點左右去咗游水，游一陣又上水出去個 balcony 躺係沙灘椅度休息，對於個西九日落美景，太relaxed 了。突然收到阿仔個 FaceTime call, 即刻㩒 accept, 佢見到我著住浴袍同訓o係沙灘椅，好 surprised： 媽媽，你係邊度啊？點解唔駛返工嘅？
我答：姨姨带我去玩… 今日下午放假！
佢即刻話：你咁懶架，唔返工，去咗嘆 SPA！
我o地即刻 shock 咗，點解佢會識 SPA, 仲要用嘆字嚟形容，嘆 SPA ~ 😆
我估，佢應該係跟得佢阿媽多，睇太多 Christy 姐姐嘅潮什麼！
尋日妹妹放學返屋企，換衫前突然o係運動褲袋攞咗幾舊玩具小積木同一隻介子仔出o黎，好開心叫我o地睇。見到o個堆嘢，媽媽我心感不妙，有些少懷疑…
之後，我同婆婆輪流問佢：「𠵱，呢啲玩具邊度攞㗎？邊個俾你㗎？」妹妹依然好開心講：「學校啊… 個介子係遊戲場。」🫣
婆婆即刻好大反應：「吓，學校嘅玩具唔可以攞返屋企㗎喎！有冇問老師？」妹妹個樣嚇咗一嚇，可能 feel 到自己做左 d 唔好嘅事，所以即刻講：「老師話可以㗎！」
嗰一刻，媽媽我心情係 OMG 😨 點解呢個小女孩講大話可以咁自然⋯⋯
我再溫柔咁試探下，妹妹，呢啲玩具點玩架？放喺邊度架？係咪老師俾㗎？
呢隻妺妹太醒，可能已經知道自己「瀨嘢」，所以盡量差開話題，無正面回答。當然，我亦都唔想我哋誤會左佢，所以當日下午，我打俾老師確認返件事，結果係老師無俾玩具小朋友拎返屋企玩。我o係電話度同老師講，我聽日會叫妹妹還返啲玩具，同埋今晚我會同佢講返正確嘅行為，亦都請老師聽日可以同妹妹講多一次 class rule。
今朝，我決定陪佢一齊返學，親自還返啲玩具俾老師，妹妹入到課室，我陪住佢同老師講，我哋還返啲玩具返嚟啦，亦都知道以後唔可以帶學校啲野返屋企啦！老師都好好，同佢講：「唔緊要，係唔係尋日唔小心拎咗，還返o黎就可以啦。」個一刻，我諗妹妹都唔好意思，不斷擦眼睛…
呢次係一次好好嘅學習機會，希望佢會明白，以後要做一個誠實嘅小朋友🙏🏻
之前o既 post 都提過妹妹豬絕對係一個有啲古惑，非常 street smart 嘅人，而家，了解深o左之後，再要加多樣 ”strength”, 就係唔會蝕抵～
話說今日爸爸同妹妹整咗個 Bohemia Look, 帶o左個頭 coo 仔，佢好鍾意… 哥哥同佢玩，但手衰衰咁將佢個頭 coo 拉咗落嚟，妹妹即刻超大反應，喊得好激動… 我o個一刻都唔知點解，好燥底，突然火起，狂鬧哥哥… 結果，哥哥好傷心咁喊咗好耐 🥺
我見到佢喊，已經立即好後悔，感覺自己反應過大，唔知會唔會誤會o左佢… 我等佢冷靜啲，就入房想安慰o下佢，但阿仔可能仲未平伏，急急腳咁走出廳，係飯枱角落背住我哋默默咁流眼淚 😣
我走過去，攬住佢，細細聲問佢：「係咪媽媽誤會o左你？」佢搖頭，老公話佢係想同妹妹玩，但無諗過佢反應咁大…
我再同阿仔講：「雖然媽媽無誤會，但頭先咁大聲鬧你，係媽媽做得唔好，我要同你道歉…」
佢聽到之後又激動喊咗一陣，但攬住我時，感覺到佢無再委屈…
突然間，聽到妹妹把聲，原來佢叫緊我…
妹妹：「媽媽，你頭先都有鬧我！」然後加個委屈嘅喊樣😓
Well… 咁為咗公平起見，我都輕輕同妹妹道歉… 等佢心理平衡啲 😜
但，呢個小姐，年紀細細，都真係唔會蝕抵！
感恩 so far 阿仔係學校讀得唔錯，老師都俾機會佢試唔同嘅嘢… 今個禮拜佢就做咗班代表，同其他3個同學仔參加學校嘅「狀員爭霸戰」😂
大家都應該無咩點準備，老師淨係叫佢地 weekend 溫吓中英數常同中華文化… 我哋都無咩 idea 點溫，常識同中華文化就開 YouTube 睇吓，中英數就無得點溫，之前有幾多料就係幾多料吧！
結果，佢哋比賽成績當然一般般，排第三，1C/1D 雙冠軍。阿仔又無咩，仲同我地講：「媽媽，千祈唔好攞冠軍呀，要做古代人，好熱㗎⋯⋯ 」（我諗，佢意思係，贏咗，學校要小朋友著古裝，影相留念）
然後，佢再 emphasise 一個重點：同埋，冠亞季軍同最尾 d 禮物都一樣嘅～
OH OK, ，阿仔，原來係咁 😅
上個禮拜去咗一個小朋友嘅生日會，妹妹玩得好開心～
尋日，我哋玩緊嘅時候順便商量下哥哥生日做咩好，妹妹突然大聲講：potty, potty 呀⋯⋯
哥哥可能好 confused, 問佢：你要 potty 做咩？all shu shu?
妹妺：唔係，potty 呀，birthday potty~
然後，我哋終於都意會到！
問妹妹：你係唔係想講 birthday party 呀？
之後，小姐就好開心咁點頭，然後跑走咗，繼續玩～
自從 YouTube 介紹咗俾妹妹 baby doll 嘅 video 之後，佢就鐘意咗呢個玩意。
佢3歲生日，就送咗個BB俾佢，係佢第三個 baby… 尋晚，同佢玩 baby role play 時，佢好用心咁介紹佢啲寶貝俾我識…
「呢個係郭麗麗、呢個叫郭美美，係婆婆改嘅名…」
然後，我指住最新個 baby, 咁佢叫咩名呀？
妹妹呆左一陣，好明顯係唔記得咗…
然後，3秒之後，就好有信心同我講：佢叫阿姐！
呢個回應，真係噴飯 😆
今日問返婆婆，原來新 baby 叫靚靚 ～
阿仔今年成為咗小學雞，雖然係比較 happy school, 但始終都係傳統學校，考試默書功課在所難免，興幸，佢都唔抗拒坐定定溫習，成績 so far 都唔錯。
平時，我哋都set 個比較高嘅目標比佢，因為佢學校程度唔深，以下就係佢嘅 Tier of Awards 😂
1. 中文寫作、中文閱讀、英文同數學如果全部滿分： 微影車一架
2. 如果平均每份卷錯少過2題: Tomica 車一架
3. 如果每份卷錯少過3題：每一份過關卷可以玩3次冒險樂園或Namco
今日，阿仔同我講某位同學仔好慘，因為佢考試70分會有奬品… 我心諗，咁正？然後，佢就解釋：
佢媽咪話如果考70-80，就會奬2本練習；考80-90，就奬一本練習，如果90分以上，先有真正嘅奬品😆
我聽完之後，真係佩服o個位媽咪，太有計啦！
